12 comparsas participan no Desfile-Concurso de Entroido en Tui

Será o martes 24, festivo local, ás 18h polas rúas novas

As rúas novas de Tui volverán converterse este martes, día 24 de febreiro, no escenario do Entroido tudense coa celebración do Desfile-Concurso. A cita comezará ás seis da tarde e prolongarase ao longo de case dúas horas, até a entrega dos premios. Agárdase coma cada ano que centos de persoas ateiguen o circuíto por onde desfilarán as comparsas, máis aínda tendo en conta que é festivo local en Tui. A organización corresponde á Concellería de Cultura de Tui.

Este ano participan 12 comparsas, que suman máis de 500 compoñentes, das que 6 son de Tui, 2 de Tomiño, 2 de Gondomar, 1 de Nigrán e 1 de Redondela.