A Praza de Abastos de Tui participa na campaña “Este inverno presume de praceiro”

Está promovida pola Dirección Xeral de Comercio coa colaboración do Concello de Tui

Esta campaña ten como obxectivo a promoción dos mercados municipais de Galicia, xa que dende a Dirección Xeral de Comercio, salientan que estes mercados son sinónimo de garantía de calidade, bo servizo e atención personalizada. Engadindo que son garantía de boa compra avalada polos profesionais que traballan nestes mercados. Precisamente a Xunta co obxectivo de por de relevo a profesionalidade dos praceiros pon en marcha esta iniciativa para que os consumidores elixan aos praceiros máis queridos e valorados.

Deste xeito dende o luns 8 de novembro e ata o sábado 4 de decembro os clientes da Praza de Abastos de Tui recibirán un cupón por cada compra que deberán encher co seu nome, apelidos e teléfono de contacto, e no mesmo deben indicar tamén o nome do seu praceiro favorito. Logo o cupón deben depositalo nunha urna instalada na praza. Entre todos os cupóns o 22 de novembro e o 2 de decembro farase o sorteo de tres cheques de compra por importe de 75, 50 e 25€. Estes vales serán logo canxeables, ata o 31 de decembro, no propio mercado coma desconto en próximas compras.

Unha vez rematada a campaña será elixido o praceiro máis valorado polos clientes da Praza de Abastos, que recibirá o seu galardón nun acto institucional xunto aos outros praceiros seleccionados dos 100 mercados municipais galegos onde se leva a cabo esta iniciativa.

O Concelleiro responsable da área de Comercio, Moisés Rodríguez, destaca o valor desta campaña xa que pon de relevo a profesionalidade dos vendedores da Praza de Abastos, que asesoran aos consumidores na elección dos mellores produtos frescos para a nosa dieta diaria. O tempo salientase tamén, indica o edil, a estreita relación entre os clientes e o vendedor, asentada na confianza, profesionalidade e trato cercano e familiar.