Mercado medieval, gastronomía, espectáculos históricos, ... forma parte do amplo programa a celebrar de venres a domingo
Tui regresará esta fin de semana á época medieval coa primeira edición do Festival Arraianos. Dende a Porta da Pía ata a praza de Fromista pasando polas prazas de San Fernando, a Misericordia e San Telmo haberá ambientación medieval, mercado, gastronomía, animación de rúa, espectáculos e recreacións históricas...que comezarán o venres pola mañá e rematarán o domingo a última hora. A entrada é gratuíta aínda que algunhas actividades son de pago.
O festival foi presentado este mediodía na casa do concello de Tui polo alcalde en funcións e concelleiro da Eurocidade, Miguel Capón, a concelleira de Cultura, María José González, a directora de Arraianos, Andrea Costa, e o presidente de ACITUI, Juan Carlos Blanco.
Miguel Capón, alcalde en funcións e concelleiro da Eurocidade, salientou que este é un evento apoiado por todo o equipo de goberno, agardando que se institucionalice a súa celebración pola relación que ten a cidade de Tui co medievo e que será realzada con esta actividade.
María José González, concelleira de Ensino e Cultura, explicou que Arraianos non é só un festival senón que abarca moitos eventos dende conferencias históricas, a espectáculos, postos de artesanía e gastronomía, un rastrexo, banquetes, deporte... no que agardan se dean cita miles de persoas esta fin de semana na cidade.
Andrea Costa, directora de Arraianos detallou o amplo programa a realizar que comezará o venres ás 10h cun paseo de personaxes medievais dende a Glorieta de Vigo ata a Catedral. Durante os tres días, venres, sábado e domingo, ás 11h comezara a animación musical e abrirá o mercado medieval que continuarán ao longo da xornada. Cada xornada ás 19h na praza de Fromista abrirase a zona “Receitas de Poniente” con tapas inspiradas na serie Xogos de Tronos.
O venres a Aula da UNED no antigo convento de San Domingos acollerá distintas conferencias sobre Tui na época medieval no que intervirán entre outros os historiadores tudenses Marta Cendón e Suso Vila.
A praza de San Fernando acollerá recreacións históricas teatralizadas da “Tentativa de invasión portuguesa” e do “Tratado de Tui” o venres ás 19h, ou “Liza”, un combate medieval, o domingo ás 21.15h. Amais haberá espectáculos de danza a cargo da Escola de Danza Paula Cobián o venres ás 23h “Aquelarre” e o domingo ás 12.30h “Campesiñas” e ás 20h “Peregrinos”. Pero tamén se celebrará o venres ás 00.30h o espectáculo de lendas, lume e bruxería “Noite das Coruxas” e o sábado ás 23h “Noite dos Cruceiros”. O sábado á noite haberá un particular rastrexo, o Survival Zombie para o que as entradas están á venda ao prezo de 25€ en Game Over e Libreiría Nobel.
Amais o venres ás 21.30h celebrarase no adro da Catedral un Banquete Medieval no que os comensais terá que ir caracterizados para disfrutar do menú composto por Ensartado de cordeiro, polo á mel, sopa cremosa de berzas, cebolas en salsa, peras ao viño e mazás asadas... cun prezo de 25€ para adultos, 12 para nenos de 8 a 12 anos e 8€ para os menores de 8 anos. Amais o domingo haberá unha representación dun xantar medieval con animación a cargo do grupo de Musica Tradicional Arume de Malvas.
O sábado ás 11h comezará “Á conquista do Miño” unha carreira medieval en kaiak entre a praia de Areiros e o Centro Interfederado, no que os participantes ataviados da época medieval terán que recuperar panos de cores en distintos puntos do río. O prezo da inscrición é de 8€ con piragua propia, 15 con piragua individual de aluguer e 30€ con piragua dobre de aluguer. O sábado ás 19h celebrarase na Praza de San Fernando unha voda medieval no que unha parella de Huelva celebrará o seu casamento.
Os que se acheguen ata Tui poderán disfrutar de visitas teatralizadas con representación de escenas medievais previstas para o domingo ás 17h cun prezo de 8€ para maiores de 14 anos e de 5€ para os menores desta idade Arraianos pecharase co espectáculo “Os guardiáns da mandrágora” o domingo ás 23.30h.
Sem comentários:
Enviar um comentário