Tui- Ofrenda do Antigo Reino de Galicia

O Concello ofrece transporte gratuíto a todos os tudenses que desexen participar

O vindeiro domingo 9 de xuño o Concello de Tui exercerá as función de Delegado rexio no solemne acto da Ofrenda do Antigo Reino de Galicia a Xesús Sacramentado na Catedral de Lugo.

Para propiciar a participación dos cidadáns de Tui nos actos desta singular tradición acompañando á Corporación Municipal o Concello de Tui, segundo informa o Alcalde nun bando dictado no dia de hoxe, ofrece transporte gratuíto para todos os interesados en participar neste evento. Os buses sairán en torno ás 07,00 da nosa cidade regresando arredor das 19,00 horas para chegar de novo a Tui sobre ás 22,00 horas.

As persoas interesas deben inscribirse nas Oficinas do Concello de Tui en horario de 09,00 a 14,00 horas, ou no teléfono 986 60 36 43, ata o vindeiro día 3 de xuño.

Anualmente, o domingo seguinte ao do Corpus Christi ten lugar en Lugo este acto institucional e relixioso centenario no que participan os mandatarios das antigas capitais do Reino de Galicia: A Coruña, Lugo, Ourense, Santiago de Compostela, Mondoñedo, Betanzos e Tui. Trátase da ofrenda ao Santísimo e a súa posterior procesión pola cidade, coa que aquelas autoridades cumpren co voto solemne que fixeron en 1669, ante as dificultades económicas da Catedral de Lugo, de dotala dunha renda anual coa que iluminar o Altar Maior onde está exposto permanentemente o Santísimo Sacramento.

Ata os nosos días celébrase ininterrompidamente este rito da Ofrenda do mesmo xeito nunha misa solemne: por quendas rotatorias anuais, os mandatarios municipais das sete cidades do Antigo Reino de Galicia (o alcalde de cada cidade ou un delegado ou representante seu) presenta a Ofrenda.

É a tradición institucional mais antiga que se conserva en Galicia como símbolo da nosa identidade e condición colectiva do noso país. Correspondíalle á cidade de Tui exercer a súa quenda no pasado ano 2012 pero cedeuna tras unha petición formulada polo rexedor de Lugo para poder inaugurar as obras de restauración da Capela Maior do templo catedralicio lucense.