Trinta artesáns galegos danse cita esta fin de semana na XIX Feira de Artesanía de Tui

Esta fin de semana celébrase no Conxunto Histórico XIX Feira de Artesanía de Tui organizada polo Concello co obxectivo de revitalizar esta zona da cidade apostando ao tempo pola artesanía.

A presentación desta actividade tivo lugar esta mañá na Casa do Concello de Tui por parte do alcalde de Tui, Moisés Rodríguez, a concelleira de Cultura, Vanesa Rodríguez, xunto a Begoña Lobato e Encarnación Carnero da Asociación de Palilleiras do Baixo Miño, María del Mar Fandiño Alonso da Asociación Xuvenil e Cultural do Traxe de Tui, e os artesáns tudenses Mª José Vázquez Pérez, Mª Jesús Pérez Diz e Juan Antonio Fontán Monteiro. 

Marroquinería, cerámica, bixutería, cestería, pratería, xoeiría, instrumentos tradicionais son algúns exemplos dos produtos que se poderán ver e mercar na feira e que estarán presentes nos trinta postos de artesáns. Dez deles son de Tui, dezanove da provincia de Pontevedra e un da provincia de Ourense. 

O alcalde de Tui, Moisés Rodríguez, agradeceu a presenza dos artesáns que acoden anualmente á Feira e apuntou que é moi ilusionante converter unha afección en profesión e nunha forma de vida. 

A concelleira de Cultura, Vanesa Rodríguez, explicou na súa intervención  que esta actividade se realizará nas ubicacións habituais que son a rúa Ordóñez, e nas prazas do Concello e de San Fernando. Animou ademais aos tudenses e visitantesa  que acudan a ver os traballos artesanais que se exporán ao aire libre.

Os artesáns que asistiron á presentación deron conta dos produtos e técnicas que estarán presentes na Feira. A palilleira Begoña Lobato apuntou que explicarán, en directo, algunhas das técnicas que utilizan para facer os seus encaixes. Pola súa parte, María del Mar Fandiño, da Asociación do Traxe de Tui, relatou que estarán na Praza de San Fernando, onde amosarán as técnicas para confeccionar un traxe e levarán un exemplo elaborado polas alumnas da Asociación. Finalmente, a artesá María José Vázquez, contou que se dedica á cestería e as elaboracións que presentará na Feira estarán feitas con madeira de castaño.

Acompañando á feira haberá animación nas rúas de Tui a cargo dos grupos folclóricos das parroquias da cidade.

Debido á celebración da Feira de Artesanía dende mañá venres ás 7h e ata o luns ás 11 non poderá circular nin estacionar na rúa Ordóñez. 

XIX Feira de Artesanía de Tui

Sábado 9 e domingo 10 de 12 a 33h

30 postos de exposición e venda de artesanía

Participación da Asociación de Palilleiras do Baixo Miño e da Asociación Xuvenil e Cultural do Traxe de Tui con bordado ao aire

Na rúa Ordóñez, na Praza do Concello e na Praza de San Fernando

Sábado 9

Ás 12.00h Grupo folclórico Seixos Albos de Areas

Ás 13.00h Grupo folclórico Refaixos e Polainas de Baldráns

Ás 17.00h Grupo de gaitas A Insua de Caldelas

Ás 18.30h Grupo folclórico Lembranzas da Terra de Guillarei

Ás 20.00h Grupo folclórico San Xoán de Paramos

Domingo 10

Ás 12.00h Grupo folclórico Inquedanzas de Pazos de Reis

Ás 13.00h Grupo folclórico San Fins de Rebordáns

Ás 17.00h Grupo folclórico Xuntanza de Randufe

ÁS 18.30h Grupo folclórico O Mosteiro de Pexegueiro

Ás 20.00h Grupo folclórico Santa Columba de Ribadelouro