terça-feira, 31 de maio de 2016

O Concello de Tui investirá máis de 100 mil euros nos centros educativos do municipio

O Concello de Tui vai investir máis de 100 mil euros en obras de mantemento nos distintos centros educativos do municipio que serán realizadas aproveitando as vacacións escolares de verán. 
A principal actuación centrarase na reforma do patio do CEIP de Randufe e no arranxo do pavillón do CEIP de Caldelas, onde amais serán instaladas portas de seguridade. Pero o parón estival será aproveitado tamén polo Concello para acometer outras tarefas de mantemento nos distintos centros educativos consistentes en pintado de aulas, cambios de ventás, ou arranxo de instalacións precisas dado que os colexios tudenses teñen todos máis de tres décadas de antigüidade.
A esta aportación municipal sumaranse os 41 mil que a Consellería de Educación investirá no arranxo da cuberta do CEIP de Rebordáns. Amais ao través de plans da Deputación levaranse as obras para unhas novas instalacións para o comedor escolar do CEIP nº2.
Onte na sinatura do convenio coa Consellería de Educación para o mantemento dos centros o alcalde de Tui, Enrique Cabaleiro, e a conselleira de Ensino, María José González, trasladaron ao conselleiro Román Rodríguez, a necesidade de acometer a construción dun novo colexio para a parroquia de Pazos de Reis, para o que o Concello xa puxo a dispor do seu departamento os terreos na Finca Lagarteira. O conselleiro trasladoulle a boa disposición da Xunta para acometer este centro, quedando pendente o envío de documentación ao respecto dos prazos barallados.