No decurso deste acto de presentación intervirán: o alcalde de Tui, Moisés Rodríguez Pérez, o presidente da Fundación Mapfre, Alberto Manzano Martos, o vicepresidente Executivo da Fundación Ignacio Larramendi, Luis Hernando de Larramendi, e o director de proxectos da Fundación Ignacio Larramendi, Xavier Agenjo Bullón.
Este acto coincide coa celebración na nosa cidade dunha xuntanza conxunta dos Consellos Territoriais de Madrid e do Noroeste de Mapfre.
Esta iniciativa da Fundación Ignacio Larramendi, coa colaboración neste caso da Fundación Mapfre, pretende dar a máxima visibilidade posible, tanto á obra do sabio tudense coma as relacións que mantivo cos seus predecesores e cos seus contemporáneos e a repercusión, verdadeiramente formidable, das súas ideas pero que, como en tantos outros casos, son escasamente coñecidas na filosofía da modernidade e polo público en xeral.
Para dar relevancia a súa obra e traxectoria a través da rede de redes, baixo a dirección de DIGIBIS S.L., e coa inestimable colaboración da Fundación Mapfre, se ten creado a “Biblioteca virtual Francisco Sánchez”, onde se teñen empregado para a creación deste sitio as técnicas máis avanzadas de datos abertos enlazados (LOD pola súas siglas en inglés) que permiten a navegación entre autores, conceptos, etc.
Francisco Sánchez foi un médico e filósofo do século XVI cuxa aportación á Filosofía resulta cada día máis relevante, dende o punto de vista da crítica. Se inscribe dentro da liña de pensamento do pesimismo e escepticismo radical, de aí provén o seu sobre nome de “O escéptico”.
Francisco Sánchez naceu en Tui en 1550 e, aínda que bautizado na cidade de Braga, sempre se considerou tudense: Ego Franciscus Sanctius, hispanus, natus in civitate Tudensis”. Nesta cidade residiu na súa infancia pois o seu pai o médico Antonio Sánchez é contratado polo Cabido tudense en 1558. Dada a súa ascendencia xudía a familia tivo de emigrar cara Burdeos aos poucos anos e alí comeza a súa formación. Será en Toulouse onde finalmente Francisco Sánchez acade unha praza na súa Universidade. En 1581 se publica o seu libro Quod nihil scitur, unha obra clave na filosofía moderna, Amais unha das principais características do seu pensamento, moitas veces esquecida, é o feito de que Francisco Sánchez foi o primeiro en empregar o concepto de “método científico”.
Para o alcalde de Tui, Moisés Rodríguez, a celebración desta presentación é a culminación dun ilusionante proxecto que este Concello de Tui animou dende o ano 2006, coa celebración dunhas xornadas dedicadas a este egrexio tudense, e que contribuirá de xeito excepcional a revitalizar o coñecemento da obra e da traxectoria dunha das personalidades máis relevantes da nosa historia. Agradece especialmente o interese con que a Fundación Ignacio Larramendi, e nomeadamente o seu vicepresidente D. Luis Hernando de Larramendi, e a Fundación Mapfre puxeron neste proxecto.
A historia e o patrimonio tudense, sinala o rexedor, non está conformado unicamente polos edificios que integran o noso conxunto histórico senón que se enriquece coas biografías de tantos e tantos tudense que realizaron importantes achegas á vida colectiva e, entre estes nomes, a figura do médico e filósofo Francisco Sánchez ocupa un lugar preeminente que con este proxecto que agora se presenta gozará de maior relevancia e recoñecemento.
Como complemento, dende o pasado luns na zona anexo da Sala Municipal de Exposicións do Concello de Tui se exhibe unha pequena exposición que recolle os principais fitos da traxectoria e das obras do médico e filósofo tudense preparada pola Concellería de Cultura tudense.
Web site de Francisco Sánchez na páxina da Fundación Ignacio Larramendi
http://www.larramendi.es/francisco_sanchez/i18n/micrositios/inicio.cmd
Máis información sobre Francisco Sánchez
http://tudensia.blogspot.com.es/2008/09/francisco-snchez-o-tudense.html
Sem comentários:
Enviar um comentário