O ALCALDE DE TUI DEFENDE A CONTINUIDADE DO PARADOR DE TURISMO

Unha defensa que dende o pasado verán ten expresado diante da Presidencia de Paradores

A importancia para o turismo da comarca e a defensa dos postos de traballos eixes deste compromiso

O Alcalde de Tui, Moisés Rodríguez Pérez, ven de reclamar, nunha nova oportunidade, diante da Dirección de Paradores de España a continuidade do seu establecemento radicado en Tui, tanto pola defensa dos postos de traballo alí existentes, como pola importancia que este establecemento posúe para a oferta turística da nosa cidade e a súa contorna. Neste sentido se ten expresado nunha nova carta enviada á Presidenta e Conselleira Delegada de “Paradores de España” S. A., Ángeles Alarcó, no día de onte.

Esta carta do alcalde tudense é a última xestión realizada, ata agora, en relación ao Parador tudense. Unha actividade que comezou no pasado mes de agosto onde, tras o despido do director do establecemento, o Alcalde se interesou xa diante da dirección de Paradores pola continuidade deste establecemento e da súa oferta. Posteriormente, a principios de setembro, mantivo en Tui unha entrevista coa Conselleira Delegada onde insistiu nesta vontade municipal remarcando o carácter emblemático deste establecemento para a cidade de Tui. Ángeles Alarcó quedou de informarlle das medidas que estaban estudando para a reestructuración desta cadea. Información enviada nunha carta de data 26 de novembro e recibida no Concello de Tui o pasado luns, 3 de decembro, onde informa do inicio dun proceso de reestructuración a negociar coa axentes sociais da empresa, pero sen detallar outra información. Como resposta a esta última misiva e ás informacións que recollen os medios de comunicación está a carta enviada onte polo Alcalde tudense. 

Neste tempo tamén o rexedor tudense mantivo unha xuntanza co persoal do Parador tudense amosándolle o seu apoio na continuidade dos seus postos de traballo que garanten a permanencia deste establecemento e o rexedor tudense voltará reunirse con este colectivo para axudar, na medida que sexa posible, na permanencia destes empregos.

Resulta por tanto falso que o Alcalde tivese coñecemento no Pleno do pasado día 29 de novembro desa carta como afirma o grupo municipal socialista do Concello de Tui. Esta Alcaldía leva meses preocupándose pola continuidade deste establecemento turístico e liderando –en solitario, pois ningún outro grupo municipal manifestou nada ao respecto ata estes últimos días- a defensa tanto dos traballadores como do propio Parador. Nunha nova oportunidade o grupo socialista tenta ocultar as súas incapacidades políticas para albiscar un problema –do que non se enteran ata cando sae na prensa- con infundadas acusacións cara os que xa levan meses traballando a prol da permanencia do Parador de Turismo “San Telmo” da nosa cidade como é o caso do goberno municipal tudense.