2.491 peregrinos escolleron Tui como inicio do Camiño de Santiago

  2.491 peregrinos escolleron Tui como inicio do Camiño de Santiago Portugués no pasado mes de agosto, o que supón 300 máis que no ano anterior, en que se acadara a cifra de 2.181. En canto a cidade veciña de Valença, a cifra foi de 1121, o que fai un total de 3612 no que se refire ao conxunto da Eurocidade.

O aumento de camiñantes con respecto ao ano pasado é xeral xa que este mes de agosto rexistrouse un total de 6400 peregrinos no camiño portugués, 1300 máis que no ano anterior.

Con estes datos Tui segue ocupando o posto número catro en canto a localidade elixida para iniciar o Camiño de Santiago, precedida unicamente por tres localidades de alongada tradición no Camiño francés:  por Sarria, S. Jean P. Port e O Cebreiro. Porén, se consideramos os datos da Eurocidade, esta ocuparía o posto número tres, reflectindo a importancia que o fenómeno da peregrinación posúe na nosa cidade, porta de entrada do Camiño portugués en Galicia.

Así, valóranse positivamente os datos deste ano, xa que a peregrinación como movemento cultural e turístico non só favorece o intercambio cultural entre pobos, senón que tamén é un importante motor económico que dinamiza a vida local.